SENATE EN D' BOXING BRAWL

IPINATATAWAG ng Senado ang ambassador ng Pilipinas sa Argentina.
Dapat lang.
Kasi’y isang kahiya-hiyang eksena ang nakita ng buong mundo sa YouTube nang bugbugin, paluin ng silya, balibagin ng botelya ang Pinoy boxing champ na si Johnriel Casimero matapos patulugin ang Argentinian fighter na si Luis Lazarte para sa IBF light flyweight crown.
Dapat ay alamin ng Senado kung ano ang tunay na nangyari at kung umaksiyon ba ang embahada o gobyerno ng Pilipinas kaugnay ng pambabastos sa Team Philippines at maging sa bandila ng Republika.
Kapag napatunayang nagkasala ang corner ni Lazarte kasama ang mga miron, nararapat lamang na maglabas ng apology ang gobyernong Argentina para humupa ang galit ng mga Pinoy na nagmamahal sa boxing at sa Pilipinas.
Ipinakikita rin ditto kung gaano kapanganib ang larong boxing, hindi lang dahil sa dami ng kaso na napapatay sanhi ng matinding suntok sa ulo, bagkus bunga na rin ng mga walang disiplinang miron na umaatake sa mga boksingerong kalaban ng kanilang manok.
Hindi biro ang eksenang nakita sa buong mundo.
Tumpak lamang ang pagdinig upang maunawaan natin kung ano ang tunay na nangyari at umaksiyon ang gobyerno upang maproteksiyunan ang “marami pang Casimero” sa hinaharap.
(EDITORIAL, Bulgar newspaper, Feb. 16, 2012 issue, unedited. Cc: bistado.blogspot.com/ editorsdiary.blogspot.com/ bistadokamao@yahoo.com/ 09297740745)